O programa da Deputación de Pontevedra "Conectadas" 2019 continúa poñendo en marcha accións formativas dirixidas a empoderar ás mulleres da provincia mediante a formación. Deste xeito, Entre este luns 21 e o 24 de outubro comezan catro novos obradoiros nos que participarán un total de 69 mulleres pertencentes a asociacións de catro concellos pontevedreses.
Máis polo miúdo, 16 mulleres de Lalín participarán na acción formativa Reciclaxe. Medio Ambiente, organizada pola Asociación de Mulleres en Igualdade de Busto. O curso comezará este luns 21 de outubro, desenvolverase ata o 13 de xaneiro no Local Social de Busto e terá lugar os luns, de 15:00 a 18:00 horas.
A Asociación de Mujeres de Cabral Rosalía de Castro levará a cabo un obradoiro Iniciación ao Parchwork na que participarán 15 mulleres do concello de Vigo. Este curso, que comezará o martes 22 de outubro, terá lugar os martes de 18:00 a 20:30 horas en Cabral (avenida Santa Mariña, 95) e rematará o 21 de xaneiro de 2020.
En Fornelos de Montes, 23 integrantes da Asociación de Mulleres Rurais Consumidoras e Culturais A Xuntanza de Fornelos de Montes comezan o 24 de outubro a acción formativa Ximnasia de Mantemento, que terá lugar os xoves, de 18:30 a 20:30 horas, no Multiusos de Fornelos de Montes ata o 13 de febreiro.
Por último, tamén o día 24 comeza en Salceda de Caselas un curso denominado Coidados, Dependencia II, ó que acudirán un total de 15 persoas da Asociación de Veciños de Caselas. Esta acción terá lugar os xoves, de 18:00 a 22:00 horas, no local da asociación e rematará desde o 19 de decembro.
"Conectadas" 2019 é un programa provincial que pon o acento na formación, desenvolvendo cursos e obradoiros sobre distintas cuestións para apoderar ás mulleres e dotalas das ferramentas necesarias para construír unha sociedade igualitaria. Ademais, esta iniciativa busca favorecer as relacións interpersoais e intercambio de experiencias, contribuír a mellorar a súa empregabilidade e o seu mantemento no mercado de traballo, así como reducir a brecha dixital. Está dirixido a asociacións, federacións e fundacións que traballan para a promoción das mulleres, o seu desenvolvemento, o empoderamento feminino e a consecución da igualdade entre mulleres e homes.
