- ― Desde a entrada en vigor do Fempa, Mar financiou 339 iniciativas que están a mobilizar no litoral galego máis de 45 M€
- ― Os oito grupos de Acción Local existentes en Galicia representan máis de 13.000 profesionais do sector pesqueiro
O Consello da Xunta de Galicia deu conta das axudas destinadas a proxectos das estratexias de desenvolvemento local participativo en que colaboran os grupos de Acción Local do Sector Pesqueiro (GALP), e que contan cun orzamento por parte da Consellería do Mar de preto de 18 millóns de euros, cofinanciados polo Fondo Europeo Marítimo, de Pesca e de Acuicultura (Fempa).
Asemade, e co obxectivo de facilitarlles o acceso ás entidades beneficiarias, a Administración autonómica ofrécelles ás entidades beneficiarias a posibilidade de solicitar o anticipo das achegas e elimina a exención de garantías, un trámite administrativo este último que ata o de agora era de obrigado cumprimento para poder acceder a estas subvencións.
Os proxectos, que se desenvolverán nalgún caso ata 2029, promoverán un impulso económico e social significativo nas comunidades costeiras. Desde a entrada en vigor do actual Fempa, a Administración autonómica financiou 339 iniciativas que están a mobilizar no litoral galego máis de 45 millóns de euros.
Beneficiarios
Os potenciais beneficiarios destas axudas -pequenas e medianas empresas e persoas autónomas, así como persoas xurídicas sen ánimo de lucro como as confrarías de pescadores ou outras entidades do sector- poden presentar proxectos ao abeiro dos oito GALP existentes na Comunidade para aumentar o valor, crear emprego, valorar o fomento da participación das mulleres, atraer xente nova e promocionar a innovación en todas as fases da cadea de subministración dos produtos da pesca e da acuicultura.
Entre os obxectivos das iniciativas tamén están o fomento da economía azul nas zonas pesqueiras e acuícolas, o aproveitamento do patrimonio ambiental -incluídas as operacións de mitigación do cambio climático-, o impulso do benestar social e do patrimonio cultural ou o reforzo do papel das comunidades pesqueiras no desenvolvemento local e a gobernanza dos recursos e das actividades marítimas locais.
Para poder aplicar as estratexias de desenvolvemento local participativo, a Consellería do Mar seleccionou a finais do ano pasado oito GALP. Son os da Mariña-Ortegal, Golfo ártabro Norte, Golfo ártabro Sur, Costa da Morte, SEO de Fisterra, Ría de Muros e Noia, Costa Sostible, Ría de Arousa, Ría de Pontevedra e Ría de Vigo-A Guarda.
Estes oito grupos engloban máis de 400 organizacións locais en representación dos sectores económicos, sociais e públicos, das que preto dun cento pertencen ao sector pesqueiro representando máis de 13.000 profesionais do mar. Neste sentido, Galicia foi a primeira comunidade autónoma en seleccionar os grupos, en aprobar as súas estratexias e en lanzar a convocatoria de axudas.
Resultados do período FEMP
Con respecto ao anterior fondo, o FEMP, entre 2016 e 2022, executáronse algo máis de 700 proxectos ao abeiro dos GALP. Contaron cun apoio público de máis de 37 millóns de euros e un investimento de preto de 80 millóns.
As iniciativas postas en marcha permitiron xerar máis de 400 empregos directos a tempo completo e a actividade inducida no conxunto da economía superou os 215 millóns de euros.
