A conselleira de Política Social e Igualdade, Fabiola García, reuniuse esta mañá coa alcaldesa de Teo, Lucía Calvo, para valorar o impacto que terá o acordo acadado entre a Xunta e a Fegamp para o incremento do prezo do servizo de axuda no fogar (SAF), que permitirá que os concellos poidan mellorar a prestación deste servizo social.
Neste sentido, a conselleira explicou que “se trata dun acordo histórico que suporá un incremento do 50% da achega do Goberno galego” a este servizo que é de competencia municipal. En concreto, explicou que no caso do concello de Teo, o incremento ao longo destes tres anos será de case 650.000 euros, o que lle suporá, recalcou, un importante aforro nas arcas municipais, ao tempo que seguen mellorando a ratio de atención.
Deste xeito, Fabiola García sinalou que “coas cifras na man vemos o beneficioso que será este acordo para os concellos galegos” e que demostra o compromiso da Xunta de Galicia coas Administracións locais e, sobre todo, con todos os dependentes galegos. Por iso, insistiu en que “é unha mágoa, que mentres a Xunta avanza en dereitos sociais, o Goberno central siga sen cumprir a Lei” e sen aportar o 50% do financiamento; polo que, lembrou, a débeda con Galicia ascende a 2.900 millóns de euros.
Por outra parte, a conselleira tamén denunciou que o Goberno central paralizou o Plan de Choque da dependencia e da discapacidade da Xunta por un afán puramente recadatorio. Así, explicou que coas máis de 12.500 homologacións automáticas da discapacidade realizadas pola Xunta o pasado ano, o Executivo central deixou de recibir 114 M€, causando un importante dano a todos os galegos.
