- Contará coa asistencia de expertos do eido académico e con persoal da Xunta, así como doutras comunidades
A Xunta de Galicia publica hoxe no DOG (https://www.xunta.gal/dog/Publicados/2026/20260407/AnuncioO150-270326-0001_gl.html) a convocatoria para inscribirse na xornada de presentación da Estratexia galega de contratación pública que terá lugar o 23 de abril, na Escola Galega de Administración pública.
A xornada, dirixida especialmente ao persoal empregado público dedicado a labores de contratación pública, contará coa asistencia de expertos do eido académico e con persoal da Xunta, así como doutras comunidades.
A nova estratexia de contratación pública define as principais liñas de acción nesta materia para os vindeiros anos, partindo das peculiaridades territoriais, demográficas e de dispersión poboacional galegas. Así, un dos obxectivos definidos no documento é o fomento da contratación estratéxica, potenciando a participación na compra pública das pemes galegas, a través de diferentes accións, como programas formativos dirixidos a pequenas e medianas empresas e autónomos, a creación dun canal específico de asistencia e a inclusión de medidas de colaboración no eido da innovación.
Así mesmo, promove, por exemplo, a inclusión de criterios de proximidade e comercio local de produtos de tempada, frescos e procedentes de agricultura ecolóxica nas licitacións que inclúan alimentos. Ademais de dar prioridade á inclusión de criterios de calidade, para que a valoración da oferta económica non sexa o único criterio.
A Estratexia galega de contratación pública busca tamén mellorar a eficiencia dos procesos de contratación a través de accións que permitan detectar os puntos nos que resulte posible axilizar a tramitación dos expedientes, así como o incremento do uso de novos sistemas de contratación que permitan reducir os tempos de tramitación administrativa dos mesmos.
A redución das cargas para as empresas a través da contratación electrónica e o fomento do uso de ferramentas de automatización e de intelixencia artificial nos procedementos de contratación pública son outras prioridades.
A Estratexia aborda tamén a especialización do persoal empregado público dedicado á área de contratación pública, potenciando a formación específica en todos os aspectos relacionados con esta materia.
Por outra banda, recolle tamén un obxectivo estratéxico específico dirixido á compra pública sanitaria, incluíndo accións como o impulso dos plans de contratación centralizada de material sanitario ou formación específica para o persoal que intervén nestes procesos de compra pública.
