A convocatoria estrutúrase en catro tipos de programas e introduce importantes reservas orzamentarias co gallo de favorecer a equidade no mercado de traballo. En concreto, destínanse 2 millóns de euros en exclusiva para plans integrados de mulleres desempregadas e outros 2 millóns de euros para maiores de 52 anos. Así mesmo, resérvase 1 millón de euros para entidades inscritas no Rexistro único de Entidades Prestadoras de Servizos Sociais (RUEPSS) que desenvolvan accións para persoas en situación ou risco de exclusión social.
Os programas xerais acollerán a outros colectivos con especiais dificultades como persoas con discapacidade, menores de 30 anos, migrantes, desempregados de longa duración ou afectados por expedientes de regulación de emprego (ERE) extintivos. Como norma xeral, cada plan deberá atender a 100 persoas (60 no caso dos programas de exclusión social)
Accións obrigatorias e plans formativos encamiñados ao mercado actual
As entidades beneficiarias deberán deseñar un itinerario integral de 12 meses que inclúa, de forma obrigatoria, orientación laboral, técnicas de coaching e motivación, obradoiros de entrevista, prospección empresarial e un mínimo de 15 alumnos en prácticas profesionais non laborais en empresas.
A formación terá un peso fundamental cun mínimo de 200 horas en especialidades do Catálogo do SEPE, sumado a un módulo obrigatorio de formación transversal en igualdade de xénero e conciliación. Co obxectivo de aliñar a cualificación coas demandas reais do tecido produtivo, os criterios de valoración primarán os plans formativos vinculados aos sectores industriais estratéxicos de Galicia (como a automoción, téxtil, naval, TIC, agroalimentación ou loxística) e a familias profesionais con alta inserción laboral. Ademais, as persoas desempregadas recibirán unha bolsa de 10 euros por día de asistencia ás accións do programa.
Incentivos á fusión municipal e novidades tecnolóxicas
O baremo de concesión tamén apoia a eficiencia na xestión pública. Os concellos que fosen resultado dun proceso de fusión municipal nos últimos dez anos recibirán de xeito directo 30 puntos, mentres que as solicitudes conxuntas de agrupacións ou mancomunidades sumarán 10 puntos co obxectivo de incentivar a colaboración local. Aqueles municipios adheridos á rede de "Concello emprendedor" contarán con 20 puntos adicionais.
Como novidade orientada á modernización administrativa, a orde valorará con ata 2 puntos a implantación interna de tecnoloxías emerxentes para a xestión e o seguimento do propio programa, tales como ferramentas de Intelixencia Artificial (IA), a análise de Big Data, robótica ou o uso de tecnoloxía 3D
