A plataforma de administración electrónica TEDeC, baixo a que operan oitenta entidades locais de provincia da Coruña ao abeiro do proxecto Concello Dixital da Deputación Provincial, ven de recibir una nova integración orientada ó arquivo definitivo de expedientes e documentos electrónicos.
Así, a comezos de xuño, arrancaba formalmente na sede municipal do Concello de Oroso a fase de probas desta nova funcionalidade, coa asistencia do seu secretario municipal e traballadores municipais da área de Arquivo. A presentación e demostración técnica do proxecto estivo dirixida polos responsables da Sección de Administración Electrónica da Deputación da Coruña, co apoio do equipo técnico do proxecto de Arquivo Electrónico Provincial e tamén da área de Transformación de Concello Dixital.
Archive é unha aplicación web de arquivo definitivo de expedientes e documentos electrónicos, que cumpre co disposto no RD 4/2010, do 8 de xaneiro, polo que se regula o Esquema Nacional de Interoperabilidade no eido da Administración electrónica. A implantación do arquivo electrónico nas entidades locais require da aprobación previa da política de xestión documental municipal.
A fase piloto desta integración é o preludio da súa implantación en todo o mapa do ecosistema Concello Dixital da Deputación da Coruña. A posta en marcha desta ferramenta representa un novo fito na folla de ruta da entidade provincial cara a transformación dixital das entidades locais da provincia.
