- Estes apoios serven para cofinanciar gastos de persoal, o Servizo de Axuda no Fogar Básico, programas de inclusión e centros de emerxencia social
- A maior contía é para a contratación de máis de 830 profesionais, entre traballadores sociais, educadores sociais, auxiliares administrativos e outras categorías
- Estas subvencións tamén contribúen ao desenvolvemento duns 176 programas de interese social en toda Galicia
A Xunta de Galicia concedeu aos concellos subvencións por valor de 17,3 millóns de euros para financiar os seus servizos sociais municipais a través do Plan Concertado. Estas achegas axudan ás entidades locais a sufragar a contratación de persoal, os custos do Servizo de Axuda no Fogar Básico, programas de interese social no ámbito da inclusión e o mantemento de centros de emerxencia social.
A partida máis importante do Plan Concertado deste ano é a dirixida a axudar a financiar postos de traballo adscritos aos servizos sociais comunitarios, un total de 13,7 millóns de euros. Esta contía permite apoiar a contratación de 832 profesionais: traballadores sociais, educadores sociais, auxiliares administrativos e outras categorías.
O Executivo autonómico tamén axuda ás corporacións locais con 2,3 millóns de euros para que leven a cabo programas sociais e apoiar o funcionamento dos centros de emerxencia para persoas en situación ou risco de exclusión. Con este importe, fináncianse 176 programas en concellos das catro provincias.
Por último, o Plan Concertado inclúe unha partida económica de 865.000 euros para o financiamento do SAF Básico e outra de 377.000 euros para reforzar os equipos de atención á infancia e á familia dos servizos sociais municipais.
