O delegado territorial da Xunta en Ourense, Manuel Pardo, desprazouse á sede da Mancomunidade Terra de Celanova, unha das entidades locais ourensás beneficiaria o pasado ano da orde destinada a financiar a contratación de mulleres que sofren violencia de xénero, na que a Consellería de Política Social e Igualdade, destinou máis de 430.000 euros, en 10 municipios e 2 mancomunidades da provincia. No caso concreo desta mancomunidade, recibiu unha achega de preto de 45.000 euros, que lle permitiu a contratación de dúas mulleres durante un período de 12 meses para a prestación de servizos de interese xeral ou social no ámbito local.
O delegado territorial aproveitou para informar ao seu presidente, Jaime Sousa, que a Xunta vén de lanzar unha nova convocatoria destas achegas dirixida aos concellos galegos, mancomunidades e consorcios locais de Galicia, co obxectivo de facilitar a inserción laboral das mulleres que sofren violencia de xénero como parte do seu proceso de recuperación e integración social. Esta orde, que conta cun orzamento de 2,5 M€ ,está financiada a través dos fondos finalistas dos Estado, no marco do Pacto de Estado contra a violencia de xénero; e o prazo para a presentación de solicitudes rematará o próximo 27 de febreiro.
Tamén explicou que a contía por cada muller contratada a tempo completo é a equivalente a sufragar durante o período de contratación, ata un máximo de 12 mensualidades, as retribucións salariais brutas totais, incluída a parte proporcional das pagas extraordinarias e as cotas á Seguridade Social por conta da entidade empregadora, neste caso os Concellos, na mesma cantidade que a fixada para o salario.
O representante do Goberno galego destacou que a finalidade desta medida do Goberno galego é contribuír a que as mulleres acaden unha maior autonomía a través da promoción da súa independencia económica e do seu apoderamento, reforzando ao mesmo tempo as posibilidades dunha posterior inserción laboral estable, co obxectivo fundamental de lograr a súa plena integración na vida económica e social.
Entidades locais ourensáns beneficiaria da orde do 2025
O delegado territorial detallou que na última convocatoria destas axudas foron beneficiarios os concellos de Celanova, Ribadavia, Bande, A Veiga, Carballeda de Avia, O Barco de Valdeorras, O Pereiro de Aguiar, Verea, Boborás, Barbadás, e as mancomunidades Terra de Celanova e Conso- Frieiras.
