O presidente da Xunta, Alfonso Rueda, destacou hoxe que o Consello deu o visto e prace a asinar nos vindeiros días un convenio coa Federación Galega de Municipios e Provincias (Fegamp) para crear a Rede de concellos contra o acoso escolar que permitirá “reforzar a cooperación das administracións” á hora de sensibilizar, previr, formar e resolver posibles casos de acoso escolar.
Rueda salientou que o Goberno autonómico traballa coa máxima de “tolerancia cero” ante calquera tipo de conduta contraria á convivencia no eido escolar. Nesta liña, lembrou que o Goberno galego leva anos traballando en prol da convivencia nos centros escolares, cun amplo abano de iniciativas que se foron intensificando nos últimos cursos e que se reflicten en actuacións específicas como o Plan integral contra o acoso e o ciberacoso escolar, a actualización do protocolo que se debe seguir nestes casos, “a prohibición do uso dos móbiles nos recintos escolares, a instalación de puntos laranxa, a ferramenta Termómetro Acoso Escolar” ou o Plan de benestar dixital, entre outros.
A posta en marcha da Rede suporá un paso máis no obxectivo prioritario da Xunta de Galicia de abordar a prevención do acoso escolar desde unha perspectiva integral e colaborativa de todos os axentes implicados e que abranguen administracións públicas, institucións, centros educativos, docentes, familias e os propios alumnos.
Estrutura e funcións
A rede centrará a súa actuación en catro eixos principais: a sensibilización, a prevención, a formación e a denuncia. A través dela poderán artellarse recursos entre a Administración autonómica e as entidades locais, compartir boas prácticas e ofrecer un apoio coordinado tanto aos centros como ás familias e ao alumnado, garantindo unha intervención máis rápida e efectiva ante posibles casos de acoso escolar.
Estará estruturada en dous órganos, que serán o pleno e as comisións provinciais e, través dela, establecerase un seguimento sistemático e continuado dos posibles casos, incorporando unha perspectiva territorial que garanta a implicación activa de todos os actores responsables a nivel local mediante os servizos que prestan os concellos.
Entre as súas funcións estarán desempeñar labores de observación, análise, asesoramento, seguimento e difusión de información sobre o acoso escolar, apoio aos concellos adheridos na elaboración de programas e accións para a prevención e intervención, desenvolvemento de plans de formación para o persoal dos concellos adheridos, difusión de iniciativas e actuacións de éxito, ser punto de referencia e consulta para os concellos que precisen orientación na xestión destes casos e fortalecemento da capacidade dos concellos para intervir de maneira máis precisa e coordinada.
Prevención, detección e abordaxe
Ademais do convenio de colaboración coa Fegamp, establecerase un marco de acordo coa Fiscalía Superior de Galicia e cos corpos e forzas de seguridade do Estado, que tamén cooperarán nesta nova rede.
Así pois, esta rede vai ter unha importancia estratéxica na medida en que facilitará o traballo conxunto cos distintos concellos de Galicia para abordar de forma integral, coordinada e eficaz as situacións de acoso que se poidan producir.
Neste senso, o obxectivo final é fortalecer a colaboración entre as institucións e entidades para previr, detectar e abordar os casos de acoso e ciberacoso no ámbito escolar. Ademais, actuarase de forma preventiva para garantir o benestar e o desenvolvemento integral do alumando galego nun clima de convivencia positiva.
