- O prazo de inscrición ábrese mañá, xoves 10 de setembro, e permanecerá activo ata o vindeiro día 20 a través da web do Colexio Oficial de Arquitectos de Galicia.
A Escola Galega de Administración Pública (EGAP), en colaboración co Colexio Oficial de Arquitectos de Galicia (COAG), convoca o
Curso de contratación pública de traballos de arquitectura. Segundo recolle a resolución publicada hoxe no
Diario Oficial de Galicia (DOG), o obxectivo prioritario desta iniciativa é proporcionar ao alumnado os coñecementos necesarios para xestionar con solvencia os procesos relacionados coas obras arquitectónicas no ámbito público.
A formación estrutúrase nun total de 33 horas lectivas distribuídas en varias xornadas de mañá e tarde (das 10:00 ás 14:30 e das 16:00 ás 18:00 horas). As clases impartiranse de xeito presencial na sede da EGAP en Santiago de Compostela (rúa Madrid, 2-4) os días 23 e 30 de setembro, e o 7, 14 e 21 de outubro de 2026.
Contidos e destinatarios
O programa abordará o marco xurídico actual definido pola Lei de contratos do sector público e a Lei de calidade da arquitectura, analizando todas as fases do proceso: desde a estratexia e a elaboración de pregos ata a licitación, execución e recepción das obras. Como complemento práctico, darase a coñecer a ferramenta informática PAUTA, desenvolvida polo COAG para a estimación de custos e a convocatoria de concursos.
O curso ofrece un total de 50 prazas, reservándose a metade delas para o persoal empregado público de Galicia (arquitectos, secretarios, interventores e persoal funcionario ou laboral dos grupos A, B, I e II con titulación superior). O resto das prazas estará destinado a profesionais da arquitectura do sector privado.
Inscrición e modalidades de matrícula
As persoas interesadas deberán formalizar a súa solicitude de xeito telemático a través da páxina web do colexio (coag.es). O prazo permanecerá aberto dende as 9:00 horas de mañá, 10 de setembro, ata as 23:59 horas do vindeiro 20 de setembro.
Establécense diferentes cotas económicas para a matrícula:
- Matrícula ordinaria: 100 euros.
- Arquitectos/as colexiados/as no COAG: 75 euros.
- Persoal empregado público e profesionais subscritos a formación do COAG: 50 euros.
Unha vez rematado o curso con éxito, as persoas participantes que cumpran coa asistencia mínima esixida (cun límite de faltas do 10%) poderán descargar un certificado electrónico de asistencia asinado pola EGAP.
