Ficha guía local

Escudo

De ouro (amarelo), e sobre ondas de azur (azul) e prata (branco), unha cruz floronada de gules (vermello) cargada de cinco vieiras de prata; mantelado de gules con dúas torres de ouro, unha en cada mantel. Ó timbre, coroa real pechad; A cruz con cinco vieiras sobre ondas, emblema que nas súas armas traían os Ribadeneira, recordan a antiga e influente presencia desta liñaxe nas terras que hoxe conforman o termo municipal de Cospeito, onde máis tarde encontrarían asento outras destacadas familias históricas (Pardo-Montenegro, Aguiar, Sanxurxo, Verdes, etc). Como complemento importante inclúense –por medio dun mantelado– dúas torres, que aluden ó destacado papel que na historia e vivir cotián de Cospeito tiveron as fortalezas da Barreira, ubicada en Santa María de Cospeito e que foi cabeza do antigo couto da Pena, e de Vilaxoán, en San Martiño de Pino e cabeza, á súa vez, do antigo couto de Mato.

Bandeira

Pano de verde con dúas torres aclaradas de vermello;na parte inferior, catro ondas de branco e azul; O pano de cor verde alude ao ambiente pola condición de pertencer gran parte do territorio municipal á reserva da biosfera Terras do Miño, declarada pola UNESCO o ano 2002, por ser lugar de importancia comunitaria (LIC) Parga-Ladra-Támoga, e por formar parte da Rede Natura 2000. As ondas de prata e azul representan a lagoa de Cospeito, os ríos Miño, Támoga, Anllo, Guisande e tamén, coma no escudo municipal, a liñaxe dos Ribadeneira, de influente presenza no municipio ao longo da Idade Moderna. As torres representan o destacado papel que desempeñaron na historia de Cospeito as fortalezas de Barreira (localizada na parroquia de Santa María de Cospeito), cabeza do antigo couto da Pena; e Vilaxoán ou Caldaloba (situada en San Martiño de Pino), cabeza, pola súa vez, do antigo couto de Mato. A súa cor amarela representa a actividade económica, agrícola e gandeira.